வியாழன், பிப்ரவரி 28, 2019

புனைவும் நினைவும்- ஒரு பார்வை




வேளாண்மை என்பது தொழில் அல்ல.. வாழ்க்கை முறை

வாழ்க்கையில் அர்த்தமே இல்லை. எந்த முக்கியத்துவமும் இல்லை. கோழைத்தனம் தான் மனிதனை வாழ வைத்துக் கொண்டிருக்கிறது. எல்லாவற்றையும் முடிவுக்கு கொண்டு வரும் தைரியம் இல்லாமல் போய்விட்டது. கோழையாக இருக்காதே. தற்கொலை தான் நீ கோழையல்ல என்பதை நிரூபிக்கும். 
-ஸெனோ, கிரேக்க தத்துவ ஞானி.

சமயவேலின் புனைவும் நினைவும் தொகுப்பானது அவரது சிறுவயது மற்றும் இளவயது ஞாபகங்களை நினைவோடை தகவல்களாக நமக்குச் சொல்லிச் செல்கிறது. முன்பாக நினைவில் நிற்கும் ஊரைப் பற்றியும், தாம் சந்தித்த மனிதர்களைப் பற்றியும் புனைவாக்கம் செய்பவர்கள் சற்று மிகையாகவே சேர்த்து (இட்டுக் கட்டி) இப்படியான மனுசன் கூட நான் பழகி இருந்திருக்கேனாக்கும்! என்று சொல்லும் பெருமை அவர்களது புத்தகங்களில் தெளிவாகவே தெரியும். போக அப்படிப் பழகிய மனுசன் கடேசி காலத்துல சோத்துக்கில்லாம, கண்ணுந் தெரியாம டிச்சுக் குழியில விழுந்து செத்தாம் பாருங்க.. அன்னிக்கி தாம் மனுச வாழ்க்கையை நெனச்சு நான் ஆறு மணி நேரம் அழுதேன் என்று முத்தாய்ப்பாய் முடிப்பார்கள். வாசகர்களும் கண்ணீர் சிந்தி அழும் நிலைக்கு தள்ளும்படி அவரது எழுத்து முறை இருக்கும். ஆனால் சமயவேல் உள்ளதை உள்ளபடி பொட்டில் அடித்தாற்போல் சொல்லி முடிக்கிறார் ஒவ்வொரு தகவல்களையும்.

உருமித் திரியும் தற்கொலைகள் என்றொரு தனிப்பகுதியில் ஒன்னம்மா அரளி குடித்தும், படித்த நகரில் வளர்ந்த விஜயாக்கா வின் இறப்பும், அமராவதி அண்ணி பூச்சி மருந்து குடித்தும், மஞ்சுளா அக்காவின் மரணமும் ஒரே பகுதியில் சொல்லப்படுகிறது. ஒவ்வொருவருக்குமான வாழ்க்கை தனித்தனியாக இருக்கிறது. தனியாகவும் சமயவேலால் சொல்லவும் முடியும் தான். இருந்து தற்கொலைகள் என்கிற தலைப்பின் கீழாக தான் ஊரில் சிறுவயதில் கண்டனவற்றை சுருக்கமாக முடித்துக் கொள்கிறார். சுதந்திர இந்தியாவில் முதல் 25 ஆண்டுகளில் ஏற்பட்ட பண்பாட்டு மாற்றங்களப் பெண்கள் முன்னெடுத்துச் சென்றதைப் பொறுக்க முடியாமல் ஆண்-மைய சமூகம் பெரும் உணர்வு ரீதியான நெருக்கடியையும் அழுத்தங்களையும் கொடுத்தது தான் காரணம் என்கிறார். போக, எல்லா தற்கொலைகளுக்கும் நிலவுடைமை கலாச்சாரத்தின் இறுக்கமான பாலுறவுக் கட்டுப்பாடுகளும் அவை சார்ந்த தவறான நம்பிக்கைகளுமே காரணம் என்கிறார். ஆண் மைய சமூகத்தில் ஆண்களின் பாலியல் மற்றும் உளவியல் பிரச்சனைகளுக்கு பெண்களையே பலி கொடுத்திருப்பதாகவும் உறுதி கூறும் போது இன்றும் மருத்துவரிடம் போய் இப்படியான பிரச்சனைகளை குணப்படுத்தும் வழக்கமே நம்மிடம் இல்லையெனவும் சொல்கிறார்.

பூமியை நம்பி வாழ்கிறவர்கள் பூமியைப் போலவே எதையும் தாங்கிக் கொள்ளும் சக்தி பெற்றவர்களாக இருக்கிறார்கள், என்று சொல்ல ஆரம்பித்து மழையில்லா வருடங்களை எவ்வளவு துன்பத்தில் ஊர்மக்கள் கடந்தார்கள் என்பதை காலத்தை துரத்திய மனிதர்கள்என்கிற பகுதியில் சொல்லப்படுகிறது.கிராமப் பொருளாதாரம் எனபது ஒரு பெரும் பொய் என்பதை பஞ்சம் பாடம் நடத்தியிருக்கிறது அங்கே. மக்கள் எறும்புப் புற்றுகளை தோண்டி அவைகள் சேகரித்து வைத்திருக்கும் தானியங்களை கொள்ளையடிக்கிறார்கள். எலிகளின் நகரில் ஒரு மூட்டை தானியம் கிடைத்ததாக மக்கள் பேசியதையும் பதிவு செய்கிறார். கழுதைக்கு கல்யாணம் செய்வித்தல், பிள்ளையாரை 3 நாட்கள் தண்ணீரில் மூங்க வைத்தல், கரைப்பத்திரகாளிக்கு முளைப்பாரியிட்டு விழா எடுப்பது போன்ற கூத்துகளும் ஊரில் நடைபெற, கடவுள் முதலான பல பொய் நம்பிக்கைகள் மழையின்றி உதிரத் தொடங்கினவென்றும் பதிகிறார்.

வடக்கத்தி அம்மனுக்கு கஞ்சி ஊற்றும் விழா சிறுவயது விழக்கால கொண்டாட்டமாக மாறுகிறது. வடக்கத்தி அம்மன் யார்? என்கிற தகவலும் சுருக்கமாய்ச் சொல்லப்படுகிறது. அதே பகுதியில் சோலையம்மாளுக்கு கஞ்சி ஊற்றும் விழாவும் சோலையம்மாவின் சோக வாழ்க்கையைச் சொல்லி இணைந்து கொள்கிறது. பாவைக் கூத்து இரவுகள் பற்றியான தகவல்களை சொல்லும் பகுதி. பாவைக் கூத்தில் ராமாயணம் தோல் பொம்மைகளால் ஒவ்வொரு இரவிலும் நிகழ்த்தப்படுகிறது. முடிவுறும் நாளில் மழை பெய்யுமென்பது ஐதிகமென சொல்கிறார். நேற்று இங்கொரு சம்பவம் சொன்னார்கள். சென்னிமலை தைப்பூசம் முடிந்த பிறகு சாரல் மழையேனும் கண்டிப்பாக பெய்யுமென. சாலையில் தேர் சென்ற தடத்தை சாரல் மழை அழிக்குமாம்! வருடா வருடம் இப்படி நடக்கிறது என்கிறார்கள். அதையெல்லாம் யார் இத்தனை காலம் கவனித்தார்கள். ஆனால் பனியும் குளிரும் விலகி கருக்கல் இருக்கிறது வானில் இதை எழுதிக் கொண்டிருக்கையில். மழையே தூராவிட்டாலும் நம்பலாம் போல.

வேலுத்தாத்தாவின்  மரணம் நிகழ்ந்த பிறகு வாசல் வழியே அவர் பிணத்தை எடுத்து வராமல் வீட்டின் மேற்குச் சுவரில் துவாரமிட்டு வெளியே கொண்டு வருகிறார்கள். அவிட்டம் அடைப்பில் அவர் இறந்ததால் அவ்வாறு செய்தார்களாம். புதிய புதிய தகவல்களுடன் நினைவோடை விரிகிறது.

பகுதி இரண்டில் ஊர் மனிதர்களைப் பற்றி சுருக்கமாகச் சொல்கிறார். பறவை மனிதனான காடை சண்முகம் காடுகளில் தான் எந்த நேரமும் திரிகிறார். அவர் வேட்டைக்காரரோ என்றால் இல்லை. அவர் ஒரு பறவை விசுவாசி. அவர் வீட்டின் பின்கட்டில் வகை வகையான பறவைகள்! பறவைகளின் கீச்சுக் குரல் கேட்டுத்தான் உறங்குகிறார். குஞ்சுகள் பொறித்ததும் காட்டிலேயே அவற்றை கொண்டு சென்று விட்டும் விடுகிறார்.  குருசாமி வெளவால் வேட்டை பற்றி விளக்குகிறார். குழந்தை செட்டியார், தபால்கார பிச்சை, கோழி திருடும் ஆறுமுகம், லாந்தர் இருளாண்டி என வித விதமான மனிதர்கள். மொத்தத்தில் கரிசல் கிராமத்தின் மண்ணைப் பற்றியும், மக்களைப் பற்றியும் நாம் வாசிக்க உகந்த  சுவாரஸ்யங்கள் நிறைந்த தொகுப்பு இது.

-ராசமைந்தன்

புனைவும் நினைவும் - சமயவேல். மணல் வீடு - விலை -100.


Post Comment

சூன்யப்புள்ளியில் பெண்- ஒரு பார்வை





மீட்பர் அவதாரத்தை அவர்கள் தரித்துக் கொள்ள நான் அனுமதித்ததே இல்லை.


உலகம் முழுதும் ஆண் மைய அரசாங்கமே ஒவ்வொரு வீட்டினுள்ளுமிருந்தும் துவங்குகிறது. ஆண் என்கிற குவியம் தன்னை வளப்படுத்திக் கொள்ளும் நிலையைத் தொடுவது அவன் ஆண் என மற்ற ஆண்களைப் பார்த்து தெரிந்து கொள்வதாலேயே. ஒரு பெண் தன்னைப் பெண் என்று உணரும் முன்பாகவே ஆண்களால் பாலியல் தொடுகைக்கு ஆட்படுகிறாள். இந்த உண்மைக் கதையில் வரும் தந்தையானவர் தன் மனைவியை அவள் பெற்ற பெண் குழந்தைகள் இறந்தால் அடித்துத் துன்புறுத்துவதில்லை. அதுவே ஆண் குழந்தையின் மரணம் என்றால் அடித்துத் துவைக்கிறார்.

நாவலாசிரியர்  நவல் எல் சாதவி பல்துறை போராளி. மருத்துவப்படிப்பை முடித்தவர் மனநல மருத்துவராக பணிபுரிந்த சமயத்தில் அவர் சந்தித்த எகிப்திய பெண்களின் வாழ்க்கையை கொண்டே பல நூல்களை எழுதியவர். “ஹெல்த்எனும் பத்திரிக்கையை மூன்று ஆண்டுகள் கொண்டு வந்தவர். சூன்யப்புள்ளியில் பெண்” 1973-ல் வெளியானது.
சுனாதிர்  சிறைச்சாலையில், செய்த கொலைக்குற்றத்திற்காக தூக்குக் கயிறை எதிர்பார்த்துக் காத்திருந்த பிர்தவ்ஸ் என்கிற பெண்ணுடன் ஏற்படுகின்ற சந்திப்பே இந்த நாவலை எழுதத் தூண்டியதாக சாதவி முகப்பில் தெரிவிக்கிறார்

பிர்தவ்ஸ் விபரமறியா வயதில் தோழன் ஒருவனுடன் கணவன் மனைவி விளையாட்டு விளையாடுகிறாள். பின்பாக தாய்மாமா இவளுடன் அந்த விளையாட்டை துவங்குகிறார். அப்பா இறந்த பிறகு தாய்மாமாவுடனேயே அவரது இல்லம் செல்லும் பிர்தவ்ஸ் பள்ளிப் படிப்பையும் துவங்குகிறாள். மாமா திருமணம் செய்த பிறகு அத்தை இவளை பள்ளியின் ஹாஸ்டலில் தங்க வைத்து விடுகிறாள். ஹாஸ்டலில் தங்கியிருக்கும் வபேயே என்கிற தோழி தன் காதலனைப் பற்றியே எந்த நேரமும் பேசுவது இவளுக்கு ஆச்சரியமாயிருக்கிறது

காதல் என்பதை உணராத இவளை அவள் கேலி செய்கிறாள். படிப்பை முடித்தவளை அத்தையின் ஏற்பாட்டில் அவரது முகத்தில் உள்ள கட்டியிலிருந்து சீழ் ஒழுகும் 60 வயது மாமாவுக்கு கட்டிக் கொடுக்கிறார். கஞ்சனான அவரது அடிகளை பொறுக்க முடியாமல் பிர்தவ்ஸ் அங்கிருந்து தப்பி காபிக்கடை முதலாளியிடம் தஞ்சமடைகிறாள். அவரது காமத்திற்கும் இறையான பிர்தவ்ஸ் அங்கிருந்து தப்பி ஆண்களுக்குப் பெண்களை நல்ல தொகைக்கு  கூட்டிக் கொடுக்கும் தன்னை விட வயது அதிகமான பெண்ணிடம் தஞ்சமடைகிறாள்.

அந்த நாய்க்குப் பிறந்த மகன் உன்னை என்ன செய்தான்?”

நீங்கள் யாரை சொல்கிறீர்கள்?” -பிர்தவ்ஸ்.

எவனோ ஒருவன், இதிலென்ன பெரிய வித்யாசம் வேண்டியிருக்கிறது? அவர்கள் அனைவருமே ஒன்று தான். நாய்க்குப் பிறந்தவன்கள். பெயர்கள் தான் வேறு வேறாக இருக்கும். மகமது,பவ்சி, சாப்ரி, இப்ராகிம், ப்யோமி

தன்னை வைத்து அவள் சம்பாதிப்பதை உணர்ந்து ஒரு கட்டத்தில் அங்கிருந்தும் தப்புகிறாள். மழை இரவில் ஒருவனின் காரில் ஏறி விடிகாலையில் பத்து பவுண்டு சம்பாதிக்கிறாள். வாழ்வில் முதலாக சம்பதித்த காசில் சாப்பிடுகிறாள். பின் இருபது பவுண்டு, முப்பது என்று தன் விலையை தானே ஆண்களுக்கு நிர்ணயம் செய்கிறாள்.
மேம்போக்காகப் பார்த்தால் இது ஒரு பாலியல் தொழிலளியின் சுயசரிதை தான்.  அவள் அப்படியானதற்கு நாமெல்லாம் சமூகத்தை நோக்கி கைநீட்டி குற்றம் சொல்லலாம். ஆனால் ஆண்மைய உலகம் இப்படித்தான் காலம் உள்ளவரை இயங்கும். இன்றொரு பிர்தவ்ஸின் கதை என்றால் மீண்டும் மீண்டும் பெண்களின் பாடுகளை தனித்தனியே எழுதிக் கொண்டே போனாலும் அது தீரப்போவதில்லை.

புரட்சியாளர்களைப் பற்றியான கருத்தொன்று பிர்தவ்ஸால் சொல்லப்படுகிறது. அவள் நாவலில் ஒரு புரட்சியாளனை சந்தித்து காதல் கொள்கிறாள். ஆனால் அவன் பணம் பெற்ற மற்றொரு பெண்ணை மணம் முடிக்கிறான். அதற்காக அழுகிறாள் பிர்தவ்ஸ். அவன் இவளைத் தேடி வந்து பயன்படுத்திக் கொண்டு கிளம்புகையில் இவளுக்கான தொகையைக் கேட்கிறாள். அவன் பத்துப் பவுண்டு கொடுக்க, தன் தொகை இருபது என்கிறாள். அவன் அதைக் கொடுத்து விட்டுச் செல்கிறான்காதலியானவளை பாலியல் தேவைக்கு ஓசியில் பயன்படுத்திக் கொள்ளும் புத்தியை செருப்பால் போடுகிறாள்.

தமக்கென கொள்கைகளையுடைய புரட்சியாளர்கள் எவரும் வித்தியாசமானவர்கள் அல்லர். மற்ற ஆண்கள் பணத்தைக் கொண்டு பெற்று விடுவதைப் போன்று இவர்கள் புத்திசாலித்தனமாக தம் கொள்கைகளைக் கொண்டு பெற்றுவிடுகிறார்கள். விபச்சாரிகளுக்கு உடலுறவு எப்படியோ, அப்படித்தான் புரட்சியாளர்களுக்குப் புரட்சியும். தவறாகப் பயன்படுத்தக்கூடியது. விற்கப்படக்கூடியது.

-ராசமைந்தன்.

சூன்யப் புள்ளியில் பெண் -நவல் எல் சாதவி.. தமிழில் சசிகலா பாபு. எதிர் வெளியீடு. விலை : 160. தொடர்புக்கு :- 04259-226012, 99425 11302

Post Comment

செவ்வாய், பிப்ரவரி 12, 2019

நகரில் தனித்தலையும் ஆடு - ஒரு பார்வை





சில்வியா பிளாத்
நகரில் தனித்தலையும் ஆடு - ஒரு பார்வை
சிறுகதைத் தொகுதி

சமகால வாழ்வின் பக்கங்களை நையாண்டி கலந்து அப்படியே கண்ணுக்கு முன் வைப்பது வா. மு. கோமுவின் படைப்புகள். 2017-18ல் நடுகல், உயிர் எழுத்து, உயிர்மை, குறி,மணல் வீடு, ஓலைச் சுவடி, விகடன் தடம் போன்ற இலக்கிய இதழ்களில் வெளியான சிறுகதைகளின் தொகுப்பு.

ஓவ்வொரு கதையும் சொல்லிச் செல்லும் செய்திகள் ஏராளம்.
வேட்டை சிறுகதையில் வரும் டைகர் நாய்க்கும் நாயகனும் உள்ள உணர்வு பூர்வமான பிணைப்பு, டைகரைத் தவிர வேறு யாரும் துணை இல்லை என்று தனிமையை உணர ஆரம்பிக்கும் போக்கு, மற்ற எல்லாக் கதைகளிலும் நீட்சி அடைகிறது.

நகரில் தனித்தலையும் ஆடு என்ற நூலின் தலைப்பு கொண்டு இருக்கும் சிறுகதை, உண்மையில் சுவரொட்டிகளை தின்று நகரத்தில் தனியா சுற்றிக் கொண்டு இருந்த ஆடு, இணைய தளத்தில் கவனம் பெற்று வைரலாகிய பின் என்னவாக ஆகிறது என்று கேள்வியை நம்முன் வைக்கும் போது சமகால அபத்தங்கள் எல்லாம் நம்முன் விரிய வைக்கின்றது.

அகவை நாற்பத்தி மூன்றில் வெங்கடசாமி - மாமனுக்கு பொண்ணு பார்க்க கூட செல்லும் மருமகனும் திருமணத்திற்கு தயாராவது கொங்கு மாவட்டங்களில் உள்ள பெண்கள் வறட்சியை, முதிர் கன்னன்கள் அதிகமாகும் நிலைகளைச் சுட்டிக் காட்டுகிறது

தொங்கீட்டானா? கதையிலும் சனிக்கிழமை வாழ்க்கை கதையிலும் வரும் அம்மாக்கள் தனியாக வசித்து வந்தாலும் மகன் மீது வைக்கும் பாசத்தை குறைக்கவில்லை. எப்போதும் அம்மா ஒரு படி உசத்தி தான் என்று தோன்றச் செய்து விடுறார்கள்.

பருஷோத்தனமாகிய எனக்கு வயது முப்பத்தொன்று சிறுகதையில் தந்தையாக வரும் கவிஞர் வாதைகளையும், சோதனைகளையும் கவிதையில் ஏற்றி விடுவார். அவரது கவிதைப் புத்தகங்களை எடைக்குப் போட்டே தங்கையின் கல்யாணத்தை நடத்தி விட்டதாக கதை நகரும் போது சமகால கவிஞர்களை பகடி செய்திருக்கும் கலை ரசிக்க வைத்தது.

லொடக்லெஸ் கதையில்
வரும் ஆசிரியரின் வாக்கு மூலம் - //என் பெயர் பழனிச்சாமி, நான் இலக்கிய சிற்றேடுகளில் எழுதுபவன். எனக்கு கதைகள் மனிதர்களின் வாழ்க்கையில் எந்த நேரமும் கிடைத்துக் கொண்டே இருக்கிறது. நான் சொல்வது எல்லாம் இந்த மண்ணினுடைய மக்களின் கதைகள் //

ஆம் இந்த கொங்கு மண்ணின் மக்களின் சமகால வாழ்க்கை முறைகளை ஆவணப்படுத்தி வைக்கும் ஒரு புத்தகம் தான் இது.

000

Post Comment

வெள்ளி, பிப்ரவரி 08, 2019

இரண்டு சிறார் புதினங்கள்






மரப்பாச்சி சொன்ன ரகசியம்

யெஸ்.பாலபாரதி

இந்த சிறார் புதினத்தை நாம் எளிதில் மற்ற சிறார் புதினங்களைப் போல கடந்து செல்ல இயலாது தான். ஷாலினியின் பள்ளித் தோழி பூஜாவுக்கு, தனக்கு நடந்த விசயத்தை யாரிடமும் சொல்ல முடியவில்லை. கீழ் வீட்டிலிருக்கும் தாத்தாவின் பாலியல் தொந்தரவிற்கு இலக்காகிறாள். அவளுக்கு தைரியமூட்டி அம்மாவிடம் சொல்லத் தூண்டுகிறது ஷாலினியிடம் இருக்கும் பேசும் மரப்பாச்சி பொம்மை. கையிலிருக்கும் பொம்மைகள் கண்சிமிட்டுவதிலும், கீ கொடுத்தால் நகர்வதிலுமே மகிழ்ச்சியடையும் குழந்தைகளுக்கு உதவும் மனப்பாங்குடன் செயல்படும் மரப்பாச்சியை பிடித்திருக்கும் என்பதில் ஐயமில்லை. வாசிக்கும் குழந்தைகள் அனைவருமே தங்களிடம் இப்படி ஒரு மரப்பாச்சி பொம்மை இருந்தால் எப்படி இருகுமெனவும் கனவு காண்பர். அந்த அளவுக்கு கதை ஓட்டம் வழியே மரப்பாச்சி என்கிற இளவரசி படிப்போர் மனதில் இடம் பிடித்துக் கொள்கிறது. சிறார் புதினங்கள் வாயிலாக மிருகங்கள் பேசுதல், காட்டுயிர்கள், மரங்கள் அழிப்பு, புகை மாசு, கடல்நீரில் மாசு, என சுற்றுச்சூழல் விசயங்களைப் பற்றி பலர் எழுதியுள்ளனர். மிக முக்கியமான குழந்தைகள் பிரச்சனையை இந்தப் புத்தகம் தான் முதலாக புதினம் வழியே சொல்கிறது. அனைத்துப் பெற்றோரும், குழந்தைகளும் வாசிக்க வேண்டிய, தமிழில் மிக முக்கியமான புதினம் இது.

வானம் வெளியீடு, விலை : 60.00. தொடர்புக்கு :- 9176549991

000


பேசும் தாடி

உதயசங்கர்

மாயாஜால யதார்த்தத்தின் வழியே பயணிக்கும் சிறார் நாவல் இது. சகானாவுக்கும் சூர்யாவுக்கும்  விடுமுறை  விடப்பட்ட தினத்தில் அவர்களது தாத்தாவும், ஆச்சியும் மகளையும் மருமகனையும் காண ஊரிலிருந்து ஏராளமான, வகை வகையான தின்பண்டங்களுடன் வந்து சேர்கிறார்கள். தாத்தாவின் அருகில் மொட்டை மாடியில் படுத்து நட்சத்திரங்கள் பற்றிய கதைகளை கேட்டு மகிழ்கிறார்கள். இம்முறை வந்திருந்த தாத்தாவிற்கு நீளமான தாடி இருக்கிறது. தாடிக்குள் பல வர்ணத்தில் சித்திரக் குள்ளர்கள் இருக்கிறார்கள். தாத்தா அவர்களை இருவருக்கும் அறிமுகம் செய்து வைக்கிறார். நீல நிற சித்திரக்குள்ளர் தன் அங்கியிலிருந்து நீல நிறப் பொடியை இவர்கள் மீது தூவ இவர்களும் சித்திரக் குள்ளர்களாகி அவர்களோடு பறந்து மகிழ்கின்றனர். இப்படி பட்டாம்பூச்சியோடு பறப்பதும், சிட்டுக்குருவியாகிப் பறப்பதும், எறும்புகளோடு பயணிப்பதுமாக நாவல் சிறார்கள் மகிழ்ச்சியாக வாசிக்கும் வண்ணம் விரிந்து செல்கிறது. இறுதியில் ஆச்சி பாட்டியிடமும் அவளது சுருக்குப் பையில் சித்திரக் குள்ளிகள் இருப்பதை சகானா காண்கிறாள். அவளின் விருப்பத்தின் பேரில் தேன் கூட்டினுள் தேன் பூச்சியாக மாறி சென்று வருகிறாள். விடுமுறை முடிந்து தாத்தாவும் ஆச்சியும் ஊருக்கு கிளம்புகிறார்கள். ஒரு மாத விடுப்பில் பேரக்குழந்தைகளோடு மகிழ்ந்திருக்க வரும் தாத்தா பாட்டியின் கதை வழியே ஏராளமான தகவல்களையும் உதயசங்கர் குழந்தைகளுக்கு தருகிறார்.

வானம் வெளியீடு, விலை :- 80.00.

-வா.மு.கோமு

Post Comment