சனி, மே 23, 2020

வைரஸ் கவிதைகள் 2




























இரண்டு கிட்னிகள் வைத்திருக்கும் சுண்டெலிகள்
வரும் 15 ஆகஸ்டு 3 திகதிக்குள்
ஒரு கிட்னியை அரசாங்கத்திடம் ஒப்படைக்கும்படி
புதிய சட்டத்தை மேன்மை மிகு சுண்டெலி ராஜா
ஒவ்வொரு குடிஎலிகளுக்கும் அறிவித்திருக்கிறார்.
சுண்டெலி ராஜா லாபநோக்கில் இப்படியான அறிவிப்பை
கொடுத்திருப்பதாயும், குடியெலிகள் ஒரு கிட்னியோடு வாழ்வது என்பது
எந்த நாளிலும் சாத்தியமாகாதென்பதால் உடனடியாக
இந்தச் சட்டத்தை திரும்பப்பெற வேண்டுமெனவும்
எதிர்க்கட்சி தலை சுண்டெலிகூஜா கூறியிருக்கிறார்.

000




குடிவிரும்பியொருவர் சாலையில்
தலைகீழாக கைகளால் எட்டு வைத்து
நடந்து வந்துகொண்டிருந்தார்.
உற்றுக்கவனித்தபோது தான் தெரிந்தது
தனது மிதியடிகளை கைக்கு மாற்றியிருந்தார்.
எப்போதுமே போதையானது
தலைக்கு ஏறவேண்டும் தம்பிஎன்றவர்
கால்களால் எனை ஆசீர்வதித்தார்.
சற்றுமுன் இயேசுநாதரை ஆசீர்வதித்துவிட்டு
வந்தவர் இவராகத்தானிருக்கவேண்டும்!
போக இன்றிரவு ஒருமணிக்கு சரியாக
சூரியன் உதிக்குமென்றார்!
அக்னி வெய்யிலில் தன் விரைகளுக்கு
பாதுகாப்பு கவசமிடாமல் செல்லுமவர்
நிச்சயமாக மீதமிருக்கும் சரக்கிற்கு
கடித்துக் கொள்ள அப்பம் ஒன்றை வைத்திருக்கணும்!

000


தோழியரோடு தாயக்கட்டைகளை
உருட்டிக் கொண்டிந்தவள் மடியிலிருந்து
500 ரூவாய் தாளை எடுத்துக் கொடுத்து
கடைக்கிப் போனீன்னா எம்சி விஎஸோபி
ஒரு ஃஆப் வாங்கிட்டு வந்து குடு, என்றாள்!
இடைக்கச்சையில் குறுவாளோடும்
வலதுபுறம் வாளோடும் சுட்டெரிக்கும்
சூரியனை சபித்தபடி குதிரை மீதமர்ந்திருந்த
சேரநாட்டு வீரனான நான் முந்தைய போரில்
முகத்தில் பெற்றிருந்த வீரத்தழும்பைத் தடவியபடி
டாஸ்மாக் நோக்கி பிரயாணம் செய்தேன்.

000


முன்பு ஒரு காலத்தில்...

000

அப்போது நான் கேட்ட கதைகளில்
எல்லா தேவதைகளும் ஏழைகளுக்கு
உதவி புரிவதற்காகவே வனங்களிலும்
சமுத்திரங்களிலும் பறந்து கொண்டிருந்தார்கள்!
மரம்வெட்டிக்கு தங்கக்கோடாரி கொடுத்த தேவதை
ஆற்று நீரில் நீந்தி வந்தவள்!
வனத்தினுள் வழிதவறி சுற்றிய சிறுவனுக்கு
உதவி புரிந்தவள் வனதேவதை.
உள்ளூர் பள்ளியோடு உலகம் முடிந்தது என்று
நம்பிய சிறுவன் நான் அப்போது.

இப்போது நான் குழந்தையிடம் சொல்லும்
கதையில் மினுக்காட்டம் பூச்சிபோல
தேவதைகள் பறந்து வருவதில்லை. -
தேவதைகள் பறந்துவரா உலகில்
பதிலாக பூதமொன்று வந்து சேர்ந்திருக்கிறது!
அது வழிதவறிய சிறுவனைப் பார்த்தும்
அவனே அவன் வீடு போகட்டுமென விடுகிறது.
கோடாரியைத் தொலைத்தவனுக்கு
வட்டிக்கி கடன் தர்றேன் வேறு
கோடாரி வாங்கிக்கோ! என்கிறது.
சீக்கிரமே ஆப்பாயிலை
வலதுகையில் பற்றியெடுத்து
தன் அகல வாயினுள் தலையுயர்த்திப்
போடும் உணவு விரும்பிகள் போன்றே
பூதம் இந்த தேசத்தை  விழுங்கிப்
போய்விடுமென கதை சொல்கிறேன்.

000


சீதாவின் கவிதை
000

சீதா பத்தாப்பு முடித்திருந்தாள்.
எந்தக் கடமானைத் தேடியும் அவள்
தன் வீட்டு வாயிலில் அமர மாட்டாள்.
அவளை  கவர்ந்து போக பக்கத்து
மாநிலத்திலிருந்து கூட வரமாட்டான் எவனும்..
அப்படி நடந்தாலும் உள்ளூரிலிருந்து கூட
யாரும் அவளைக் காக்க போக மாட்டார்கள்.
சீதா நூறுநாள் வேலைத்திட்டத்தில்
கடந்த இருவருடங்களாக பணியாற்றி
தன் வயதான தந்தையையும்
தன்னையும் காத்து வந்தாள்.
ஐம்பது நாட்களாக பணியில்லாமல் போனதால்
ரேசனில் இலவச அரிசி பெற்று
கஞ்சி குடித்து மகிழ்கிறாள் சீதா.
கையில் நூறு ரூபாய் கூட இல்லையென்ற
கவலையின்றி வாழும் சீதாவுக்கு
பக்கத்து வீட்டிலிருந்து சமையல் வாசம்
வருகையில் மட்டும் தந்தைக்கு
மாஸ்க்கை அணிவித்து தானும்
அணிந்து கொள்கிறாள் !

000


எத்தனெ நாளைக்கி மாப்ளெ?


000

வேற்றுகிரகத்திலிருந்து ஏலியன் வைரஸ்
வந்து கொண்டிருக்கிறதாம்!

-அட அக்கட்டால ஒந்தி நில்றா
ஆடுகள் மெரண்டு நிக்கிதுக பாரு
ப்பா! கூவே!

000

வெட்டுக்கிளிகள் வந்துட்டு இருக்குதாம்!
ஒரு சதுர அடிக்கி 1500 வெட்டுக்கிளிகளாம்!

-பீடி இருந்தா ஒன்னு குடு ராசு
பீடிக்கட்டை வேற நாப்பது ரூவா பண்ணிட்டானுக
வூட்டுல கேட்டாம் அத ஊதாட்டித்தா என்னோங்கறா!

000

 நான் வழக்கமாய் செல்லும் குறுநகரம்


குறுநகரொன்றின் வீதிக்கு அப்போது தான்
இருசக்கர வாகனத்தில் வந்திருந்தேன்.
ஆறு கிலோ மீட்டருக்கும் முன்பாகவே
அதிகாரிகளால் தடுக்கப்பட்டு விசாரணை
செய்யப்பட்டு அனுப்பப்பட்டிருந்தேன்.
-எங்கே பயணம்?
-ரெகுலேட்டர் வாங்க! அப்படியே செருப்பு
பிஞ்சு போனதால் புதியதாக வாங்கி வரலாமென!
-சீக்கிரம் வந்துடனும்!
-வாங்கினதீம் வந்துடறேன்.

குறுநகரில் ஆங்காங்கே இருசக்கர வாகனங்கள்
மனித எண்ணீக்கையை விட அதிகம் நின்றிருந்தன.
எல்லாக் கடைகளையும் பத்து மணிக்கே
இழுத்துச் சாத்திக் கொண்டிருந்தார்கள்.
அதிகாரிகள் அமர்ந்திருந்த வாகனம் மெதுவாக
சாலையில் கடைகளை சாத்துங்கள்!’ என்று
ஒலிப்பெருக்கியில் அறிவித்தபடி ஊர்ந்து வந்தது!
எந்த நேரமும் நமக்கு தவறான தகவல்களையே
அள்ளித் தரும் செய்திச் சேனல்களை நம்பி
குறுநகரம் வந்த நான் குழம்பி நின்றிருந்தேன்.

குறுநகரில் மாத்திரை வில்லைகள் மட்டுமே
மாலை வரை வாங்கலாமாம்! மற்றதெதையும் வாங்க
நாளை காலையில் தான் வரவேணுமாம்!
பெட்ரோலுக்கும் கேடாய் குறுநகர் வந்தவன்
மருந்துக் கடை சென்று
ஒரு டீப் போடப்பா!” என்று சொல்லி விட்டு
அவன் கடை வாசலில் அமர்ந்தேன்!

000


Post Comment

வெள்ளி, மே 22, 2020

வைரஸ் கவிதைகள்




























எதற்கும் கொஞ்சம் அடக்கிக் கொள்ளுங்கள்
உங்களின் அழுகையை.
எல்லாமும் விளக்கமாய் சொன்னவர்கள்
இதையும் சொல்லாமல் விட்டிருக்கிறார்கள்.
நான் உங்களுக்காக கிராம பஞ்சாயத்தில் பேசிவிட்டேன்.
அவர்கள் யூனியனில் பேசி நகராட்சியில் என்ன
பதிலைக் கொடுப்பார்களோ அதன் பிரகாரம்
நடந்து கொள்ளச் சொல்லியிருக்கிறார்கள்.
அவர்கள் அனுமதி கொடுத்த
பிறகு நீங்கள் பொது இடத்தில் நின்று
கூட்டமாக ஒப்பாரியை துவங்கலாம்.
அது வரை அடக்கிக் கொள்ளுங்கள்
உங்கள் அழுகையை.
000


ஞாயிற்றுக்கிழமையைக் காணவில்லை என்று
பெரிதாக புகாரைத் தூக்கிக் கொண்டு வந்து விட்டான்.
திங்கட்கிழமையும் காணாமல்தான்
போனால் என்ன வீட்டினுள் கிடப்பவனுக்கு?
000


கடந்த கோடைக் காலத்தில்
அக்னிவெய்யிலுக்காய் பயந்து
தண்ணீர் தொட்டியினுள்ளும்
மரநிழலிலும் பதுங்கியிருந்தேன்.
அக்னி வெய்யில் இந்த வருடமும்
வந்திருக்கிறது சொல்லிக் கொண்டே.
நானோ மரமாகியிருக்கிறேன்
நிழலில்லாமல்.
000


இந்த வல்லூறுகளைப் பாருங்கள்
தன் குஞ்சுகளையே இறக்குக்குள்ளே
தள்ளி நசுக்கி நசுக்கி கொன்று விட்டு
ஒன்றுமறியாதது போல பனை உச்சிகளில்
அமர்ந்திருக்கிறதை!
000

அவநம்பிக்கைகள் சூழ்ந்து கொண்ட
வாழ்வினுடைய நாட்களை ப்ரேக்கிங் நிவிஸ்
பார்த்தபடியே உச்சுக் கொட்டிக்கொண்டு
வயிற்றுப்பசிக்கு சுடுகஞ்சி குடிக்கிறோம்.
உப்பு அதிகமாய்..
இல்லையில்லை.. உப்பே இல்லை..
ஒன்றும் தெரிவதில்லை இந்த நாக்கிற்கு!
000


மீளவே முடியாத நாட்களின்
இறுக்கமான பிடியில் சிக்கியிருக்கும் நான்
எனது ஒவ்வொரு நாளின் கனவுகளையும்
இரவில் இடுகாடு வரை சென்று
குழிதோண்டிப் புதைத்து விட்டு திரும்புகையில்
யாருமற்ற சாலையில் சம்மணமிட்டமர்ந்து
மம்பட்டியை சுத்தம் செய்கிறேன்..
000


இந்தக் கவிதை இப்போதைக்கு
பெருநகர சந்திப்பில் ஊர் ஊருக்கு
நின்று போகும் பேசஞ்சர் ரயிலாய்
மாறியிருக்கிறது. - இது காதலர்களுக்கான
பிரத்யேக பேசஞ்சர் ரயில். ஊரடங்கு நாட்களில்
சில தளர்வுகள் வருகையில் இந்த ரயிலை
இயக்கும்படி காதலர்கள் கேட்டிருந்தார்கள்.
ஒவ்வொரு ஊரிலும் ஏறும் காதலர்களிடம்
கட்டணங்கள் ஏதும் வசூலிப்பதில்லை
என நிர்வாகம் அறிவித்திருக்கிறது.
காதலர்கள் நிரம்பியபின் இயல்பு வாழ்க்கைக்கு
உலகம் வரும் வரை இந்த ரயிலானது
எங்குமே நிற்காமல் தண்டவாளங்களில்
ஓடிக்கொண்டேயிருக்கும் என்ற ஒரே ஒரு
நிபந்தனையுடன் இன்றிரவு 9.30-க்கு
பெருநகர சந்திப்பிலிருந்து இந்த ரயில் புறப்படுகிறது!
000

சந்து சந்தாய்

வீதி வீதியாய்
சுற்றிச் சுற்றி சுற்றிச் சுற்றி..
சுற்றிச் சுற்றி..
திருடி வந்தது போல
வீடு சேர்ந்து பையைக் கொடுக்கையில்
கேள்வி எழுகிறது
இப்படியெல்லாம்
பயந்து பயந்து சோறு திங்கத்தான் வேணுமா?
000

பசியை நாக்கில் தொங்க விட்டபடி நாற்கரச் சாலையை
நக்கிச் சென்று கொண்டிருக்கும் அந்த நாய் எங்கள் வீட்டில்
வளர்க்கப்பட்ட நாயல்ல!

ரயில்வே தண்டவாளத்தில் கற்களைக் கொத்தி
உண்டபடியே சென்று கொண்டிருக்கும் அந்தக் கோழி
எங்கள் வீட்டில் வளர்க்கப்பட்ட கோழியல்ல!

 சல்லிக்கற்கள் தனக்கான உணவல்ல
என்பதையறிந்த வெளிமாநில கோழி அது!
அது போலத்தான் அந்த நாய்க்கும் தெரியும்
தார்ச்சாலையை நக்கியபடி சென்றால் பசியாறாதென!

இரண்டும் தங்கள் மாநிலத்துக்கு வேறு வேறு
பாதையில் பயணப்பட்டு சென்றுவிட முயற்சிக்கின்றன.

இங்கு எதுவும் எங்களைக் கேளாமல் எப்படி நிகழலாம்?
தன்னிச்சையாக எந்த விலங்கினமும் இங்கே செயல்படக்கூடாதென
படித்துப் படித்து சொல்லிக் கொண்டிருக்கிறோம் அதைக் காதிலேயே
வாங்கிக் கொள்ளாமல் என்ன நடக்கிறது இங்கே?

அமைதி கொள் கோழியே! என் அருமை நாயே!
செல்லவிரும்புமிடத்திற்கு கூடிய சீக்கிரம்
ரதத்தில் பயணிக்கச் செய்கிறோம்!
000


தலைவரையும் தலைவரின் எல்லா
திரைப்படங்களையும் அவனுக்கு பிடிக்கும்.
வீட்டிலேயே இருங்கள் என்று அரசு
அறிவித்த பிறகு மனைவிக்கு உதவியாய்
சமையல்கட்டில் நின்றிருந்தவன் நாட்கள்
நகர நகர தனித்தே சமையல் கட்டில்
நின்றுவிட்டான்.

மனைவியும் அம்மாவும் தாயக்கரம்
ஆடிக் கொண்டிருக்க சமையல் முடித்த
கையோடு டிவி பார்க்கத்துவங்கினானவன்.
தலைவரின் புதிய படம் போட்டிருக்கிறார்கள்.
இதைத்தான் தியேட்டரில் இரண்டாம் நாளே
சென்று பார்த்திருந்தான்.

தலைவர் படம் வெளியாகிற பழைய நாட்களில்
கூட்டமாய் தியேட்டரில் ரசிகர்களோடு அமர்ந்து
லாட்டரி டிக்கெட்டுகளை சுக்குநூறாய்க் கிழித்து
திரை நோக்கி வீசி மகிழ்வான்.
தலைவர் டொக்காகி விட்டாரோ?
அன்று தியேட்டரில் எண்ணி பதினொரு பேர் தான்
தலைவரை பார்க்க அமர்ந்திருந்தார்கள்.
தலைவர் திரையில் முதலாக தோன்றும் காட்சியில்
இவனாக விசில் போட்டான்.

நான் சீக்கிரம் வருவேன்என்று தலைவர் சொன்னபோது
இவனுக்கு மீசை நரைக்காமல் இருந்தது.
இப்போது தலைவரைப் போன்றே மீசைக்கும்
டையடிக்கத் துவங்கி விட்டிருந்தான்.
டிவியில் செய்தி சேனல் பக்கமும் சென்றான்.
தலைவர்  மத்திய அரசுக்கும், தமிழ்நாடு அரசுக்கும்
எத்தனை கோடிகள் கொடுத்தாரென இவனுக்கு
தெரிந்து கொள்ள ஆர்வமாயிருந்தது.
தலைவர் விளக்குப் பிடித்து விட்டு வீட்டினுள்
கையசைத்தபடி சென்றார். - இவனும்
கையசைத்தான் தலைவருக்கு.

திரைப்படத்திற்கே திரும்ப வந்தான்.
வந்துட்டேன்னு சொல்லுஎன்றார் தலைவர்.
டிவியை நிறுத்தி விட்டு சோகமாய்ப் போய் கட்டிலில் சாய்ந்தான்.

அலைபேசியை எடுத்து நண்பர்களுக்கு
சொல்லிக் கொண்டேயிருந்தானவன்.
தலைவரு உண்டுனா ஒரு தொகையை
குடுத்துட்டு வெளிய காட்டிக்க விரும்பலன்னு
சொல்லிட்டாராம்!’
000


வேறு வழியேதுமில்லை.
அவர்களுக்கு இப்போது தான்
பயம் தொற்றிக்கொண்டிருக்கிறது.
சட்டியில் இருந்தால் தானே ஆப்பையில் வரும்
என்றும் தெரிந்து விட்டது.
இங்கு சம்பாதித்துத்தான் ஊருக்கு
அனுப்பிக் கொண்டிருந்தார்கள் அவர்கள்.

இத்தனை வருடங்கள் மாடாய் உழைத்தும்
முதலாளிகள் கை விரித்து விட்டார்கள்.
தங்கியிருந்த அறைகளில் எத்தனை நாட்கள்
தான் ஈரத்துணியை வயிற்றுக்கு கட்டிக் கொண்டு
படுத்துறங்குவது?

நாளுக்கு நாள் தொற்றெண்ணிக்கை கூடிக்
கொண்டேயிருக்கிறது.
ஊருக்குச் செல்ல பேருந்தையோ,
ரயில் வண்டியையோ கேட்பதற்கும்
வைரஸ் பயத்துடன் சாலையில் அமர்ந்து
போராட வேண்டியிருக்கிறது.

அதிகாரிகள் அப்போதைக்கு சமாதானப்படுத்தி
அறைக்குள்ளேயே போய் படுத்துறங்குங்கள்
என்று சொல்கிறார்கள்.
நாளையும் அவர்கள் சாலைக்கு வந்து
நின்று அனுப்பி வையுங்கள் எங்களை
என்று கேட்பார்கள். - ஒட்டு மொத்த
குரல்களும் நாளை மீண்டும் சாலை நடுவே
உங்களுக்கு கேட்கையில்
யாரைக் கேட்டு வந்தீர்கள்?’ என்று மட்டும்
கேட்டு விடாதீர்கள்!

000


Post Comment